داها دوغروسو
سوچلویام سه‌نین‌چین
اؤده‌یه بیلمه‌میشه‌م بورجومو
اوزگون باخیشلی گؤزله‌رینه.
دوداغین سه‌ییره‌نده
گووه‌ن‌‌سیز اوره‌یینین
فیرتینا جایناغیندا دیدیلمه‌سینی
دویموش اولسام دا
آچا بیلمه‌میشه‌م
نفسینه قارشی دوران
زهه‌رلی دویون‌له‌ری.
غربتده یاشادین بو سئیره‌ک زمانه‌نی
بیر گؤزون
منیم قار ـ کوله‌ک آلمیش اوجاغیمدا،
بیر گؤزون دوغولاجاق گون‌له‌رین نه کیمی‌لییینده.
دئدیم کؤرپو سالاجاغام
خیالیندان یاشاییشینا
سربست عؤمور سوره‌جه‌ک
اولدوزا یوکسه‌له‌ن دیله‌ک‌له‌رین.
سوچومو باغیشلا
دیلیم قاپالی، قولوم باغلی‌دیر.