نه چوخ بهانه‌سی وار گئتمه‌یینین
دانیلماز و یوزولماز
الیمدن ده بیر ایش گلمیر.
من کیمم کی؟
ساده‌جه ناصر داوران
آدینین یانیندا روونقسیز بیر آد
دؤیوش میدانیندا سیلاحسیز عسگر.
نه من نرودایام
سئوگینی یازام یئر کوره‌سینه
نه کیتابیم داشییا بیلیر
گؤزلرینده‌کی رنگارنگ چیخیشلاری.
سن دولا بیلرسن
چایلارین کوکره‌ک خاطیره‌لرینه،
قوشلارین قانادیندان پای اومماق
سنین بدعتین.
منیم الی چه‌لیکلی شعریمی
ترک ائدیرسن اگر
اولدوزا نه داخلی؟
آیا نه داخلی؟