او بؤیوکلوکده تهران
باکی‌‌نین بیر جیبی ده اولماز، دئیردی.
خاطیره‌‌لرین دانیشاندا
گؤز یاشین
بایاتی‌‌نین هئجالارینا جالایاردی.
«اوشاق‌‌لارین اودونا یاندیم»، دئیردی
یوخسا گلمزدیم.
اؤفکه‌‌سین اوفوردوکجه
بیر شئی جانیندان قوپوب
آلتمیش ایل گئری دؤنردی
آرازدان کئچه‌‌رک
گؤزللییینه
قیزلیغینا
گنجه‌‌نین قوینوندا
تورپاق عطری دولاردی جییریمیزه.
یول‌‌لار آچیلاندا
آیاقدان دوشموشدو
گئده بیلمه‌‌دی
گلن‌‌لری ده یاخشی تانیمادی
بونونلا بئله
تهران یئنه ده
باکی‌‌نین بیر جیبی دئییلدی.