ایکی نفر
ناصر داوران
ائشیدیرمی‌سن
دنیزین آیاق سس‌لرین
بو چتین کیشی‌نین
باخیش‌لاریندا؟
چیچک قوخولو قافاسیندان
دیکسینیر چیرکین قرارلار
اؤلوم قورخور.
موسیقی دادی وار
حیاتا کئچیریلمه‌میش دویغولاریندا.
بیر نفر
فیشقا چالا ـ چالا
ساحل بویو
آیاق‌لارین تولازلاییر
یانیندان اؤتن‌لری
گؤرمه‌دن،
مارتی‌لارا قارمان چالان اوغلانین
سوتول بارماق‌لاریندا تومورجوقلانان
یانیق کرم‌دن
خبرسیز.