قادین گؤزلرینی
منیمله پایلاشا بیلمه‌سنده
آییرا بیلمز سنی مندن
طبیعتین ایکیلی چیخیشی.
جنت‌دن قووولدوغوموز گوندن
یاساق میوه‌نی
هؤرومجک‌لرین توروندا
چارمیخا چکسه‌لر ده
جنت دئیه، تورپاغی
گردک ائتمیشیک.
قیدالانیب جانیمیز
آلمانین
بوغدانین
حرارتیندن.
الیمیز هر یئردن اوزولسه‌ده
چیچکله‌نیب اللریمیزده
اوره‌کلریمیز
یارانیب بؤیوک سئوگی
باخیشلاریمیزین قوووشدوغو یئرده
یابانچی‌لاردان قورخوسوز.
سرحدلنمز دویغولاریمیزین
سوچلاندیریلماسینا باخمایاراق
کهکشان‌لار یاخاسینا دئمیرم
یار دؤشونه چیچک تاخمیشیق
عطری، بویاسی کؤورک
گؤزونده تیتره‌ین ایسلاق اوتانج کیمی
کؤکسونده منیمله دانیشان
قیزیل قانادلی شعیر کیمی.
قوی ائشیتسین بیزی
جهنمین قاپیسیندا دوران غضبلی ملک‌لر
قوی ائشیتسین بیزی
اولو تانری‌نین راپورتچی‌لاری:
بیر داها دؤنمک ایسته‌میریک
آدام بابانین قووولدوغو یئره.
یاشاسین سورگونلوک
یاشاسین یاساق میوه.